Gjysmëfinalet e “Play-off”-it të ProCredit Superligës vazhdojnë me super ndeshje këtë mesjavë.

Garat shtesë kanë dhuruar emocione dhe adrenalinë, që po vazhdon të rritet.

Mesjava sjell sfidat e katërta gjysmëfinale, që janë shumë të rëndësishme. Skuadra që shënon tri fitore kualifikohet në finale. Të gjitha ndeshjet gjysmëfinale janë fituar deri më tani nga vendësit.

Në kryeqytet ndeshen Sigal Prishtina me Trepçën, në një tjetër sfidë që pritet të jetë shumë interesante. Prishtinasit synojnë fitoren dhe të barazojnë serinë në 2:2, kurse mitrovicasit të fitojnë dhe të kualifikohen për herë të katërt radhazi në finale.

Takimin e parë e fituan mitrovicasit 80:65, të dytin e fituan prishtinasit pas vazhdimeve 90:83, ndërsa të tretin mitrovicasit 67:61.

Gjysmëfinalja tjetër është po ashtu shumë interesante ndërmjet Pejës dhe Bashkimit. Prizrenasit po udhëheqin 2:1 në serinë gjysmëfinale dhe synojnë fitoren për tu kualifikuar në finale, ndërsa pejanët të barazojnë serinë në 2:2, në mënyrë që finalisti të përcaktohet në sfidën e pestë.

Portokallezinjtë fituan ndeshjen e parë 81:61 dhe të tretën 84:78 pas vazhdimeve, kurse pejanët fituan ndeshjen e dytë 84:79.

Gjysmëfinalet IV

E mërkurë

19:00 Sigal Prishtina - Trepça

E enjte

19:00 Peja - Bashkimi

Në Pejë është zhvilluar turneu i katërt me radhë i Alley Oop në 3x3 te meshkujt.

Ky projekt është në partneritet me FIBA Evropën, derisa qëllimi është të masivizojë basketbollin 3x3 në të gjithë Kosovën.

Në turneun e zhvilluar të shtunën në Pejë, gjithsej ishin gjashtë skuadra pjesëmarrëse.

Fillimisht janë zhvilluar ndeshjet në grupe, e më pas katër skuadrat më të mira u kualifikuan në gjysmëfinale.

Pas dy ndeshjeve gjysmëfinale, në finale u kualifikuan 03 dhe Bzz. Në një sfidë interesante 03 triumfoi me shifrat 19:14.

Skuadra fituese u shpërblye me 300 Euro.

Ky udhëtim sportiv përmbyllet me një turne final në Prishtinë, ku do të përballen fituesit e të gjitha qyteteve, të cilët do të përfaqësojnë qytetin e tyre për titullin kampion.

Dokumentari “4 Çerekët” rrëfen historinë e basketbollit të Kosovës, që nga periudhat e vështira e deri në ditët e sotme.

Dokumentari është i ndarë në katër episode, një ndarje simbolike që ndjek formatin e një ndeshje basketbolli. 

Në Kolegjin AAB, në premierën e saj është shfaqur episodi i tretë i këtij Dokumentari.

Në këtë ngjarje mjaft të rëndësishme për basketbollin e Kosovës, që shënon një hap para në këtë drejtim, kanë marrë pjesë personalitete nga bota e basketbollit dhe artit.

Dokumentari është realizuar dhe drejtuar nga autori dhe producenti Leart Hoxha, prodhim i Katror Media dhe me kontributin e ish-basketbollistit dhe gazetarit sportiv Blerim Vuniqi.

Ky projekt që është mbështetur nga Ministria e Kulturës, Rinisë dhe Sportit, si dhe përkrahur nga Federata e Basketbollit e Kosovës.

Kryetari i FBK-së, Arben Fetahu, para të pranishmëve foli për rëndësinë e dokumentarit, ndërsa Leart Hoxha dhe Muhamet Jashanica nga Katror Media, kanë folur për iniciativën dhe detajet e këtij dokumentari si është realizuar.

Dokumentari ka katër pjesë, ndërsa të premten mbrëma u shfaq episodi i tretë.

Çereku i parë përfshin fillesat e sportit, merret me fillimet e basketbollit, që nga vitet e 40-ta deri te ngritja e Buduqnostit të Pejës në vitet e ’60-ta.

Çereku i dytë fokusohet në dy klube kyçe Elektrokosova te meshkujt dhe Universiteti te femrat – që kanë përcaktuar drejtimin e zhvillimit sportiv në Kosovë.

Çereku i tretë përfshin periudhën më dinamike: pjesëmarrjen në ligat e ish-Jugosllavisë, mëvetësimin e sportit dhe sfidat gjatë okupimit e pasluftës.

Çereku i fundit tregon përpjekjet për ndërkombëtarizim, nga përfshirja në ligën Trocal dhe BIBL deri te anëtarësimi i FBK-së në FIBA në vitin 2015.