Trajnerët e mirënjohur evropianë, Oktay Mahmuti dhe Jukka Toijala kanë ligjëruar para trajnerëve të Kosovës në Klinikën e Trajnerëve të Basketbollit, që po organizohet nga Shoqata e Trajnerëve të Basketbollit të Kosovës në bashkëpunim me Federatën e Basketbollit të Kosovës.

Hapjen e Klinikës e ka bërë kryetari i Federatës së Basketbollit të Kosovës (FBK), Arben Fetahu. “Ju jeni bartës i zhvillimit të basketbollit në vendin tonë, kështu që ky aktivitet është shumë i rëndësishëm për ne dhe është në vazhdën e asaj që FBK tenton në zhvillimin tuaj. Ne do të kemi edhe aktivitete tjera. I falënderoj edhe miqtë tanë, Jukka dhe Oktay, që kanë treguar respekt për Federatën e Basketbollit të Kosovës me ardhjen e tyre”, është shprehur Fetahu para trajnerëve pjesëmarrës në këtë Klinikë, ku numri ishte mjaft i madh.

Trajneri i mirënjohur, Mahmuti, ka folur në pjesën e parë të Klinikës për Mbrojtjen Individuale, duke treguar se si të jetë më e suksesshme dhe duke bartur përvojën e tij të madhe nga basketbolli evropian. Ligjërata e tij është përshëndetur nga trajnerët e pranishëm, që kishin rastin ta dëgjojnë një trajner shumë të suksesshëm evropian.

Ndërkohë, Jukka Toijala ka folur ka ligjëruar për Zhvillimi Afatgjatë i Basketbollistëve, duke marrë shembullin nga Modeli i Akademisë së Helsinkit, që lojtarët të jenë sa më të suksesshëm dhe profesional. Në fund ishte pjesa praktike e ligjëratës së dytë.  

Klinika do të vazhdojë edhe të dielën nga ora 10:00 deri në ora 13:30 në Kolegjin “ISP Marigona”.

Për herë të parë Kosovën do ta vizitojë Sekretari Gjeneral i FIBA Botës apo numri një i basketbollit në botë, Andreas Zagklis. Ai do të vizitojë vendin tonë më 6-7 tetor, ku do të jetë i pranishëm në finalen e Superkupës Mbarëkombëtare, më 6 tetor në Mitrovicë, si dhe do të takohet me krerët e Federatës së Basketbollit të Kosovës (FBK), por edhe krerët e shtetit të Kosovës.

Zagklis është një mbështetës i madh i basketbollit të Kosovës, duke përkrahur projekte të ndryshme, si dhe FBK-në, ku në shumë raste e ka lavdëruar punën që bën Federata.

Ndërsa, kjo është vizita e parë e Sekretarit Gjeneral të FIBA Botës, më herët vendin tonë, e ka vizituar Turgay Demirel, President i FIBA Evropës dhe nënkryetar i FIBA-s.

Sekretarja e Përgjithshme e FBK-së, Elvira Dushku ka folur për rëndësinë që ka vizita e Zagklis në vendin tonë.

“Vizita e Sekretarit Gjeneral të FIBA Botës, z. Andreas Zagklis në Kosovë është e rëndësisë së veçantë, pasi kjo është hera e parë që numri një i basketbollit në botë e viziton Federatën e Basketbollit të Kosovës.

Ardhja e tij konsiston me mbështetjen e fuqishme që Zagklis e ka për Kryetarin Fetahu dhe Bordin e FBK-së në punën tonë të përbashkët për zhvillimin e sportit tonë të zemrës, basketbollit.

FIBA e ka dëshmuar mbështetjen e fuqishme për FBK-në nëpërmjet projekteve më të rëndësishme si Hartimi i Planit Strategjik të FBK-së 2021-2025, Edukimi i Trajnerëve, Licencimi i Klubeve, mbështetja e kuadrove të FBK-së për edukim si administrator dhe menaxher të sportit, si dhe projekteve për zhvillim të gjeneratave të reja, e në veçanti zhvillimit dhe masivizimit të basketbollit ndër vajza.

Ne jemi shumë të lumtur që z. Zagklis krahas takimeve institucionale, do të jetë i pranishëm edhe në finale të Superkupës Mbarëkombëtare, ku do të ketë rastin të jetë dëshmitar i një organizimi të nivelit të lartë organizativ nga FBK dhe KB Trepça", ka thënë Dushku për faqen zyrtare të FBK-së.

Të enjten (sot) është nënshkruar edhe zyrtarisht marrëveshja ndërmjet Ligës Unike dhe KB Trepçës për organizimin e Superkupës Mbarëkombëtare.

Kjo ngjarje do të mbahet më 5-6 tetor në palestrën ‘Minatori’ të Mitrovicës, ku do të marrin pjesë kampioni i Kosovës, Golden Eagle Ylli, fituesja e Kupës së Kosovës, Trepça, kampionia e Shqipërisë, Teuta e Durrësit dhe fituesja e Kupës së Shqipërisë, Tirana.

Marrëveshjen e kanë nënshkruar Elvira Dushku, anëtare e Bordit Drejtuesit të Ligës Unike dhe Përfaqësuesi i KB Trepçës, Edin Vërbiqi.

Dushku është shprehur se pret spektakël të basketbollit për dy ditë me radhë në Mitrovicë. “Në Superkupën Mbarëkombëtare marrin pjesë katër skuadra shumë të mira dhe presim spektakël të basketbollit për dy ditë me radhë, jo vetëm sa i përket ndeshjeve, por edhe organizimit. Besoj se do të jetë një organizim madhështor, që nuk e kemi parë deri më tani. Stafi i Ligës Unike dhe Federatës së Basketbollit të Kosovës do të ndihmoj që ky event të kalojë në nivelin më të lartë dhe të jetë shembull për organizimet e ardhshme”, është shprehur Dushku për faqen zyrtare të Ligës Unike.

Në anën tjetër, Vërbiqi ka folur për organizimin që do të jetë në Mitrovicë. “Për ne është krenari që Superkupa Mbarëkombëtare do të organizohet në qytetin tonë. Interesimi është shumë i madh, andaj presim që palestra të jetë e mbushur për dy ditë. Jemi të nderuar që organizojmë Superkupën, ku marrin pjesë fituesit e trofeve të Kosovës dhe Shqipërisë. Do të mundohemi ta organizojmë në mënyrën më të mirë të mundshme, ndërsa detajet tjera do t’i shpalosim më vonë”, ka thënë përfaqësuesi i Trepçës.

Superkupën Mbarëkombëtare edicionin e kaluar e kishte fituar Golden Eagle Ylli.

Xhiroja e tretë në Prince Caffe Superligën e Kosovës në basketboll do të dhurojë ndeshje interesante.

Takimi hapës i xhiros është mes Rahovecit dhe Trepçës, që zhvillohet të premten. Vreshtarët kanë një fitore e një humbje, kurse mitrovicasit kanë dy fitore dhe synojnë të tretën me radhë. Kjo është edhe një sfidë për mitrovicasit para kualifikimeve në FIBA Europe Cup.

Të shtunën zhvillohet ndeshja ndërmjet Sigal Prishtinës dhe Vëllaznimit. Të dy skuadrat kanë nga një fitore e një humbje dhe synojnë fitoren e dytë në këtë edicion.

Përballja kryesore zhvillohet në “Karagaçi” ndërmjet Pejës dhe Golden Eagle Yllit. Pejanët janë kampionë të Ligës Unike, kurse therandasit kampionë të Kosovës. Peja ka dy fitore në këtë edicion, kurse Ylli dy humbje. Takimi pritet të jetë mjaft interesant, siç ka ndodhur në takimet e fundit mes tyre.

Ndeshja e fundit e kësaj xhiro është derbi i Prizrenit mes Bashkimit dhe Ponte Prizrenit. Bashkimi ka një fitore e një humbje, kurse Ponte dy humbje në dy ndeshjet e para.

Java 3

E premte

19:00 Rahoveci - Trepça       

E shtunë

17:00 Sigal Prishtina - Vëllaznimi

E diel

17:00 Peja - Golden Eagle Ylli

19:00 Bashkimi - Ponte Prizreni 

Golden Eagle Ylli ka pësuar humbje nga Benfica me rezultat 67:92 (19:14, 23:28, 16:29, 9:21), në kualifikimet e Ligës së Kampionëve, përkatësisht çerekfinalet e kësaj gare.

Ylli bëri një paraqitje të mirë, sidomos në pjesën e parë që përfundoi 42:42, në debutim të garave ndërkombëtare, ndonëse kishte edhe mungesa për shkak të lëndimeve.

Kampionët e Kosovës e nisën ndeshjen shumë mirë, me një seri prej 6:0 dhe më pas thelluan epërsinë në 13:4, por më pas kishin një rënie të lehtë, që e shfrytëzuan portugezët, kurse çereku i parë përfundoi 19:14. Benfica vazhdoi me lojë të mirë, duke barazuar rezultatin në 19:19, e më pas kaluan për herë të parë në epërsi 21:23, ndërsa më pas zhvillohet lojë e barabartë, ku pjesa e parë përfundon 42:42, ndonëse Ylli u paraqit me vetëm gjashtë basketbollistë në parket, ku munguan Gëzim Morina dhe Malcolm Armstead, për shkak të lëndimeve.

Kjo u vërejt në pjesën e dytë, ku u shkëputën portugezët, të përkrahur edhe nga tifozët vendas. Benfica ishte më e mirë në këtë pjesë dhe fitoi në fund 67:92. Te Ylli u dalluan Bashir Ahmed me 27 pikë, Chris Harris me nëntë pikë e 14 kërcime dhe Valon Bunjaku me 15 pikë.

Kjo ishte paraqitja e parë e Yllit në garat ndërkombëtare, përkatësisht në kualifikimet e Ligës së Kampionëve. Therandasit do të vazhdojnë garat në grupet e FIBA Europe Cup.

Në fundjavë u zhvillua xhiroja e dytë e Prince Caffe Superligës së Kosovës në basketboll.

Efikasitetin më të lartë pas dy ndeshjeve e ka Trepça (189), ndërsa pasohet nga Rahoveci (185).

Vreshtarët janë në vendin e parë, sa i përket pikëve të shënuara, me 88.5 për ndeshje, pejanët të dytët me 85 dhe mitrovicasit me 82.

Trepça e ka mbrojtjen më të fortë në dy përballjet me 129 pikë të pranuara, kurse Ponte Prizreni ka pranuar ka pranuar më shumë, 183.

Vëllaznimi është në vendin e parë sa i përket kërcimeve me 49.5, ku dallohet Damonte Dodd, kurse Bashkimi është i dyti me 45 për ndeshje, kurse Rahoveci i treti me 43.5.

Sa i përket asistimeve, Ponte Prizreni kryeson me 17.5 për ndeshje, duke u pasuar nga Rahoveci me 17 dhe Peja me 16.

Kuqezinjtë nga Gjakova janë në vendin e parë, edhe sa i përket bllokadave, ku sërish dallohet Dodd. Vëllaznimi ka 6.5 për ndeshje, kurse Vreshtarët janë në pozitën e dytë me katër.

Kualifikimet e Ligës së Kampionëve do të zhvillohen në këtë mesjavë, ndërsa kampionët e Kosovës, Golden Eagle Ylli, do të ketë një mision shumë të vështirë për të depërtuar në fazën e grupeve të kësaj gare.

Benfica ka epërsinë e fushës vendase, ndërsa Brose Bamberg është emri më i madh në short, kurse Keravnos gjithashtu ka përvojë në sezonin e rregullt në BCL, shkruan faqja zyrtare e kësaj lige.

Norrkoping Dolphins nga Suedia, Budivelnyk nga Ukraina dhe Golden Eagle Ylli nga Kosova janë më pak të avantazhuara, por që nuk udhëtojnë me flamur të bardhë.

Golden Eagle Ylli

Kush janë ata?

Dy herë kampionët radhazi të Kosovës, ata fituan edhe sezonin inaugurues të Ligës Unike, liga rajonale në Shqipëri dhe Kosovë. Ata janë një nga klubet më të vjetra në Kosovë, i themeluar në vitin 1975, me një bazë të fortë tifozësh në shtëpi, duke shpresuar në herën e parë se do të kualifikohen në grupet e BCL.

Basketbollisti që duhet shikuar

Malcolm Armstead ka luajtur më parë për Prishtinën, Pejën dhe Gostivarin, ndërsa tani vjen nga Kavala e Greqisë, gati për trajnerin Adis Beciragic. Beciragiq, i cili sapo ka udhëhequr ekipin kombëtar të BeH në EuroBasket 2022 të FIBA-s, kurse do të mbështet edhe në gjigantin Ismet Sejfic.

Çfarë u nevojitet atyre për të arritur në sezonin e rregullt të Basketball Champions League?

Ata kanë nevojë për një mrekulli, sepse kanë marrë shortin më të vështirë të mundshëm, përballë Benfica-s në çerekfinale. Por trajneri Beciragic di si t'i shokojë favoritët dhe një fitore ndaj Benficës do t'i çonte ata në gjysmëfinale kundër Keravnostit, shkruan tutje faqja zyrtare e Ligës së Kampionëve.

Ndërkohë, kundërshtari i Yllit, është Benfica. Ata janë kampionë të Portugalisë dhe mikpritës të kualifikimeve. Titulli i tyre më 2022 ishte i 28-ti, ata fituan Kupën 22 herë, 12 trofe të Kupës së Ligës dhe 14 Superkupa.

Ndeshja Golden Eagle Ylli-Benfica zhvillohet të mërkurën nga ora 22:00. Ndeshjet çerekfinale do të zhvillohen më 21 shtator, dy ditë më pas (23 shtator) zhvillohen gjysmëfinalet dhe më 25 shtator finalja. Fituesi i ndeshjes Golden Eagle Ylli-Benfica do të ndeshet me skuadrën qipriote, Keravnos. Ndërsa fituesi i gjysmëfinales Ylli/Benfica - Keravnos do të luajë në finalen kualifikuese me fituesin e gjysmëfinales Budivelnyk/Norrkoping - Bamberg. Katër skuadrat nga kjo fazë do t’i bashkohet 28 skuadrave për të formuar kështu 32 skuadrat që do të garojnë në edicionin e ri të kësaj gare. Nëse Ylli nuk arrin në grupet e Ligës së Kampionëve, atëherë do të kualifikohet në grupet e FIBA Europe Cup.

Golden Eagle Ylli për herë të parë do të luajë në garat ndërkombëtare, ndërsa do të debutojë në Ligën e Kampionëve, përkatësisht në kualifikimet e kësaj radhe.

Kampionët e Kosovës do të përballen me Benficën e Lisbonës, ndeshje që do të zhvillohet në Portugali, të mërkurën, më 21 shtator nga ora 22:00, sipas kohës tonë lokale.

Ndeshjet çerekfinale do të zhvillohen më 21 shtator, dy ditë më pas (23 shtator) zhvillohen gjysmëfinalet dhe më 25 shtator finalja.

Fituesi i ndeshjes Golden Eagle Ylli-Benfica do të ndeshet me skuadrën qipriote, Keravnos. Ndërsa fituesi i gjysmëfinales Ylli/Benfica - Keravnos do të luajë në finalen kualifikuese me fituesin e gjysmëfinales Budivelnyk/Norrkoping - Bamberg.

Katër skuadrat nga kjo fazë do t’i bashkohet 28 skuadrave për të formuar kështu 32 skuadrat që do të garojnë në edicionin e ri të kësaj gare.

Nëse Ylli nuk arrin në grupet e Ligës së Kampionëve, atëherë do të kualifikohet në grupet e FIBA Europe Cup.

Therandasit janë kampionë të Kosovës në dy vitet e fundit, ndërsa një herë e kanë fituar Ligën Unike dhe Superkupën Mbarëkombëtare.

Java e dytë në Prince Caffe Superligën e Kosovës në basketboll ka dhuruar disa ndeshje interesante.

Vëllaznimi regjistroi fitoren e parë për këtë edicion në elitë, apo edhe të parën pas një viti në Superligë. Kuqezinjtë të mbështetur nga tifozët e tyre fituan ndaj Rahovecit 94:87 pas dy vazhdimeve. Më i dalluari ishte qendra Damonte Dodd me 16 pikë, 20 kërcime, pesë asistime dhe nëntë bllokada, duke e pasur indeksin e ndeshjes 39.

Rodney Purvis zhvilloi një tjetër ndeshje të mirë, kësaj radhe ndaj Ponte Prizrenit, duke qenë më i dalluari te pejanët. Purvis kishte 31 pikë, gjashtë kërcime e katër asistime. Në anën tjetër, bindshëm më i miri te Ponte Prizreni ishte organizatori Ivan Koljeviq me 32 pikë, tetë kërcime dhe 11 asistime.

Trepça regjistroi fitoren e dytë këtë edicion, ku fituan ndaj Bashkimit, kurse më i dalluari ishte basketbollisti i Kombëtares së Kosovës, Erjon Kastrati me 20 pikë, dy kërcime dhe katër asistime.

Sigal Prishtina shënoi fitoren e parë, duke mundur kampionin aktual Golden Eagle Yllin, ku më i miri në parket te bardhekaltrit ishte Dustin Thomas me 16 pikë, shtatë kërcime dhe dy asistime.

Top 5

Damonte Dodd (Vëllaznimi) 16 pikë, 20 kërcime, 5 asistime, 9 bllokada

Rodney Purvis (Peja) 31 pikë, 6 kërcime, 4 asistime

Ivan Koljeviq (Ponte Prizreni) 32 pikë, 8 kërcime, 11 asistime

Erjon Kastrati (Trepça) 20 pikë, 2 kërcime, 4 asistime

Dustin Thomas (Sigal Prishtina) 16 pikë, 7 kërcime, 2 asistime

Vëllaznimi e ka mundur Rahovecin 94:87 (22:19, 26:26, 20:17, 9:15, 17:10), në xhiron e dytë të Prince Caffe Superligës. Kjo ishte fitorja e parë për kuqezinjtë në elitë këtë edicion, ndërsa Vreshtarët kanë një fitore e një humbje.

Sfida ka qenë e jashtëzakonshme dhe është vendosur pas dy vazhdimeve.

Vendasit të motivuar nga përkrahja e tifozëve vendas, e nisën për mrekulli ndeshjen, me një seri prej 10:0, por më pas Vreshtarët u rikthyen për të ngushtuar shifrat, ndërsa çereku i parë përfundon 22:19. Periudha e dytë ishte e barabartë, ku herë njëra skuadër kalonte në epërsi e herë tjetra, ndërsa shkuan në pushim me shifrat 48:45.

Në periodën e tretë, kuqezinjtë për një nuancë shumë të vogël ishin më të mirë se mysafirët, kurse shifrat në semafor pas 30 minutash ishin 68:62. Por, drama ndodhi në fund. Epërsia e vendasve u ngrit në 11 pikë, 75:64, që ishte më e larta në ndeshje, pesë minuta nga fundi, por rahovecasit nuk u dorëzuan dhe luftuan deri në fund, ku me një seri të suksesshme barazuan shifrat në 77:77, sa përfundoi koha e rregullt, ndonëse kishin edhe një mundësi në fund, por që nuk e shfrytëzuan. Edhe në vazhdimin e parë u zhvillua lojë e barabartë, 7:7 dhe skuadrat shkuan në vazhdimin e dytë. Por, në vazhdimin e dytë, kuqezinjtë ishin më të mirë, 10:3 dhe triumfuan 94:87.

Te Vëllaznimi u dalluan Damonte Dodd me 15 pikë, 20 kërcime, pesë asistime dhe nëntë bllokada dhe William Brown me 18 pikë e nëntë kërcime, kurse te Rahoveci u dalluan Jahi Carson me 26 pikë e pesë kërcime, Chris Seeley me 12 pikë e 14 kërcime dhe Musab Mala me 19 pikë e gjashtë kërcime.

Trepça ka shënuar fitore ndaj Bashkimit me rezultat 75:68 (21:14, 28:23, 12:12, 14:19), në xhiron e dytë të Prince Caffe Superligës.

Për ‘Xehetarët’ ishte fitorja e dytë në dy ndeshje, kurse prizrenasit kanë një fitore e një humbje.

Pas pesë minutave të barabartë, mitrovicasit për një nuancë ishin më të mirë, duke e fituar çerekun e parë 21:14. Vendasit vazhduan me lojë të mirë edhe në periudhën e dytë, për të krijuar epërsi deri në 14 pikë, 41:27, që ishte më e larta në ndeshje, ndërsa skuadrat shkuan në pushim me rezultat 49:37.

Perioda e tretë ishte e barabartë, por u karakterizua me më pak pikë të shënuara nga të dy skuadrat, ndërsa shifrat në semafor pas 30 minutash ishin 61:49. Në dhjetë minutat e fundit mysafirët afrojnë rezultatin në 70:65, por pa arritur të bëjnë më shumë dhe Trepça regjistroi fitoren e dytë, 75:68.

Te vendasit u dalluan Erjon Kastrati me 20 pikë dhe Clevon Brown me 12 pikë e pesë kërcime, kurse te mysafirët u dalluan Fahron Alihoxhiq me 19 pikë e 11 kërcime dhe Prentiss Nixon me 15 pikë.

Shoqata e Trajnerëve të Basketbollit të Kosovës në bashkëpunim me Federatën e Basketbollit të Kosovës do të organizojë Klinikën për Trajnerë të basketbollit më 24 dhe 25 shtator.

Klinika do të mbahet në sallën sportive të “ISP MARIGONA” prej orës 10:00-14:00, ditën e shtunë (24.09.2022) dhe ditën e diel prej orës 10:00-13:30.

Ligjërues në këtë klinikë do të jenë trajnerët e mirënjohur: Oktay Mahmuti trajneri i mirënjohur dhe Jukka Toijala, përzgjedhës i Estonisë.

Çmimi për pjesëmarrje është 30 Euro në emër të anëtarësisë në Shoqatën e Trajnerëve.

Pagesa prej 30 euro duhet të bëhet në emër të anëtarësisë vjetore për vitin 2022-2023 në xhirollogarinë e mëposhtme:

Banka: BKT

Përfituesi: SHTBK

Llogaria: 1904545006031124

Pagesa duhet të bëhet deri më 23.09.2022 ora 16:00. Trajnerët që nuk e bëjnë pagesën nuk do t’iu lejohet që ta përcjellin Klinikën.

Kjo klinikë është licencuese dhe çdo trajner i cili nuk do ta vijon klinikën, nuk do të mund ta udhëheq skuadrën në fillim të edicionit.