18/01/2025
Vëllaznimi po vazhdon në formë të lartë, ku arriti të fitojë ndaj kampiones, Trepçës, me rezultat 78:72 (25:16, 14:18, 14:21, 25:17), në javën e 17-të të ProCredit Superligës.
Skuadra nga Gjakova e nisi ndeshjen më mirë, duke qenë në epërsi konstante në çerekun e parë, duke e fituar këtë pjesë 25:16. Periudha e dytë ishte më e baraspeshuar, ku për një nuancë mitrovicasit ishin më të mirë, 14:18, për të shkuar në pushim me rezultat 39:34.
“Xehetarët” vazhduan me lojë të mirë, dhe në periodën e tretë arritën përmbysjen në 53:55, derisa lojë mjaft interesante u zhvillua në dhjetë minutat e fundit. Katër minuta nga fundi, mitrovicasit po fitonin 60:65, por kuqezinjtë u rikthyen shpejt me një seri të suksesshme për 74:68, derisa arritën të triumfojnë në fund, 78:72.
Te kuqezinjtë më i miri ishte Jericole Hellems me 23 pikë e nëntë kërcime, ndërsa te mitrovicasit më i dalluari ishte Tekele Cotton me 23 pikë e pesë kërcime.
Vëllaznimi ka nëntë fitore e tetë humbje, derisa Trepça 12 fitore e pesë humbje.
