Welsch dhe Carrion mbajnë stërvitje me fëmijët kosovarë

Jiri Welsch, ambasador i Junior NBA dhe ish basketbollist i NBA-së, si dhe Adrian Carrion, përgjegjës i Jr NBA për Kosovë pas takimit me drejtuesit e Federatës së Basketbollit të Kosovës kanë mbajtur një stërvitje me fëmijët kosovarë.

Ata gjatë stërvitjes me djem dhe vajza ju kanë treguar atyre se sa e rëndësishme është shoqërimi mes vete dhe integrimi, ndërsa fëmijët basketbollistët e rinj kanë pasur mundësi të mësojnë shumë nga ata.

Carrion ka qenë në shumë vende të botës, dhe u ka mësuar fëmijëve disa ushtrime bazike, ndërsa Welsch ka bartur përvojën e tij tek fëmijët e Kosovës, që ishin shumë të lumtur të takonin një ish-basketbollist të NBA-së.

Stërvitje ka zgjatur më shumë se një orë dhe ishte shumë atraktive për fëmijët, kurse më pas djemtë dhe vajzat kanë bërë pyetje për Welsch, i cili ka luajtur për katër vite në NBA, për skuadrat Golden State Warriois, Boston Celtics, Cleveland Cavaliers dhe Milwaukee Bucks, si dhe pjesë e disa skuadrave evropiane, ku fitoi shumë trofe.

Ish basketbollisti i Republikës së Çekisë u ka thënë fëmijëve se duhet të punojnë shumë dhe të mos ndalen asnjëherë për të realizuar ëndrrat e tyre. Ai shtoi se vjen nga një fshat i vogël dhe është dashur që të punojë shumë, që një ditë të luajë në Ligën më të fortë në Botë.

Welsch theksoi se përvoja në NBA ishte e jashtëzakonshme, duke u uruar fëmijëve kosovarë që të përjetojnë emocione të tilla, por duhet të punojnë shumë.

Si Welsch, ashtu edhe Carrion, ishin të kënaqur me interesimin e fëmijëve për basketboll, ndërsa u kanë uruar sukses në Ligën Junior NBA Kosova, që do të fillojë së shpejti.

Në fakt kjo është arsyeja kryesore e vizitës së tyre. Të martën (nesër) nga ora 11:00 do të mbahet hedhja e Draft Shortit, ku 30 Shkolla Fillore do të ndahen në dy konferenca, Lindore dhe Perëndimore.

‍