Dramën në “Minatori” e fitojnë “Xehetarët”

Trepça bëri një hap drejt gjysmëfinales. Mitrovicasit në çerekfinale të “Play-off”-it mundën Bashkimin me shifrat 92:88 (29:29, 20:19, 19:14, 24:26).

Çereku i parë ishte interesant, ku herë njëra skuadër kalonte në epërsi e herë tjetra, por pa arritur të shkëputen dhe përfundon 29:29. Në periudhën e dytë, mitrovicasit kishin epërsi deri në dhjetë pikë, 46:36, por prizrenasit u rikthyen shpejt, për të ngushtuar rezultatin, derisa pjesa e parë përfundon 49:48.

Vendasit sërish u treguan më të mirë në fillim të periodës së tretë, ku u shkëputën në 66:55, por një seri e suksesshme e mysafirëve bëri që rezultati pas 30 minutash të jetë 68:62. Por, asgjë nuk kishte përfunduar. Përkundër se ‘Xehetarët’ ishin në epërsi konstante, Portokallezinjtë nuk u dorëzuan dhe luftuan deri në fund, duke afruar rezultatin në 90:88, megjithatë, Trepça ia arriti të fitojë 92:88.

Te vendasit më i miri ishte Kendrick Brown me 23 pikë e tetë asistime, kurse te mysafirët u dalluan Daniel Lekndreaj me 25 pikë e shtatë kërcime dhe Altin Morina me 22 pikë.

Në gjysmëfinale kualifikohet skuadra që shënon dy fitore, kurse ndeshja e ardhshme zhvillohet të dielën në Therandë.

‍