Peja me fitore bindëse barazon serinë finale

Peja ka regjistruar njërën nga fitoret më bindëse në këtë edicion. Verdhezinjtë kanë mundur Trepçën me rezultat të thellë 107:89 (32:14, 25:18, 24:24, 26:23), për të barazuar serinë finale në 1:1, ndërsa ndeshja e ardhshme zhvillohet të enjten në Mitrovicë.

Vendasit e nisën ndeshjen për mrekulli me një seri prej 12:0, e më pas të përkrahur nga tifozët vendas thelluan epërsinë në 19:2, ndërsa çerekun e parë e fituan 32:14. Pejanët të motivuar për këtë sfidë, vazhduan me lojë të mirë në periudhën e dytë, për të ngritur më shumë epërsinë, për të shkuar në pushim me rezultat 57:32.

Në pjesën e dytë u zhvillua lojë më e barabartë, megjithatë, vendasit nuk e rrezikuan fitoren dhe triumfuan në fund me fitore bindëse 107:79.

Te Peja u dalluan Jalen Tate me 22 pikë, tetë kërcime e dhjetë asistime, Larry Thomas me 18 pikë, gjashtë kërcime e shtatë asistime, Arti Hajdari me 18 pikë dhe Arian Qallaku me 12 pikë e 11 kërcime, kurse te mysafirët më të dalluarit ishin Drilon Hajrizi me 18 pikë e tetë kërcime dhe Jamal Artis me 13 pikë.

‍